شحاد
كلمات الشاعر اللبناني زين شعيب
غناء : سمير يزبك


يامين ع شحاد يهديني

منشان سر الكار يعطيني

لامال بدي ولا برزق طمعان

ولا مقصدي ضيعة ولا مدينة

بدي عصا من قهرة العميان

اتعكز عليها بتكفيني

اتدروش وابرم على الجيران

وع كل عتبة ينحني جبيني

شحاد بشحد عاطفة وتحنان

ع اللي ابتعد عني وناسيني

وبتنهنه بغصة طفل عطشان

ياقلب احترق يا مي اسقيني

شحاد بشحد كحلة الغزلان

لعيونك ال فيهم قتلتيني

وبشحدلك الغفوة من النعسان

حتى تنامي ياتقبريني

وبقصد على الارزة مهد جبران

وبقله ع سلمى دخلك اهديني

لشوف شو قلتلها قصدان

ومن روح اذكى روح غذيني

وببكي ع مجنون ليلى الكان مظلوم

والكاويه كاويني

ببحر الهوى قلبه مشي قبطان

قبطان لكن من عدا سفينة

وبرجع وبستنى شهر نيسان

وبقول بكرا الخير جاييني

بشحدلك من الورد والريحان

وين ما دعستي تقشعي زينة

وبشحدلك من الانجيل والقرآن

حجابات فيها دينك وديني

بلكي بتجي وبتطرد الشيطان

واللي ح ضيعه يحضيني

وبعدي ما انظلم انسان

ع قدما بحبك ظلمتيني

ولو كان قلبك من حجر صوان

حله يلين الصخر وتليني

وراضي لا والله مش زعلان

واعدام برضى لو حكمتيني

ع شرط بايدك تغزلي الاكفان

ومري ع اقبري بالسنة مرة

حسنة لوجه الله زوريني